Чорвачиликда наслчилик ишлари

Республикамизда чорвачиликни ривожлантириш, хусусан четдан наслли қорамолларни олиб келиш ва маҳаллий зотини яхшилаш бугунги куннинг долзарб вазифаларидан ҳисобланади. Ўз ўрнида наслчилик хўжаликлари сонининг ортгани ва уларда боқиладиган чорва молларининг кўпайиши мамлакатимизда гўшт ва сут маҳсулотларини ишлаб чиқариш ҳажмини оширишга хизмат қилади.

Зомин туманида ҳам бу масалага алоҳида эътибор қаратилиб, ривожланган давлатлардан зотдор молларни олиб келиш ва бош сонини кўпайтириш чора-тадбирлари кўрилмоқда. Бугунги кунда туманда 110 та қорамолчилик хўжаликлари фаолият кўрсатмоқда. Шундан 3 таси насчилик мақомига эга.

Мазкур тармоқнинг наслчилик ишларини ривожлантириш, камчиликларни бартараф этиш бўйича Вазирлар Маҳкамаси ҳузуридаги Агросаноат мажмуи устидан назорат қилиш инспекцияси ва унинг қуйи тизимларига бир қатор ваколатлар берилган.

Хусусан, Ўзбекистон Республикасининг “Наслчилик тўғрисида”ги Қонунининг 7-моддасига мувофиқ, Инспекция зотли ҳайвонларнинг экспорт ва импорт қилиниши, мулкчилик шаклидан қатъий назар чорвачилик хўжаликларида мавжуд зотли моллардан оқилона фойдаланилиши, чорвачиликда наслчилик ишларининг ҳисобини юритилиши устидан назоратни амалга оширади.

Шундан келиб чиқиб, “Ўзагроинспекция”нинг Зомин туман бўлими томонидан жорий йил давомида жами 35 та назорат тадбирлари ўтказилган бўлиб, натижада 28 та қонун бузулиш ҳолатлари аниқланган.

-Ушбу қонун бузулиш ҳолатлари юзасидан жами 1 та ҳолатда маъмурий чоралар қўлланилди.

Шунингдек, тегишли ташкилот ва корхоналарга 3 тақдимнома, 46 бажарилиши мажбурий бўлган кўрсатма ҳамда 3 огоҳлантирув хатлари киритилган.

Бир сўз билан айтганда, чорвачиликда наслчиликнинг ривожи халқимиз дастурхони учун зарур бўладиган гўшт ва бошқа озиқ-овқат маҳсулотларини етиштириш имкониятини оширади.

А.А.Қаршибоев

“Ўзагроинспекция”нинг Зомин тумани

бўлими чорвачиликда насилчилик ишини

назорат қилиш бўйича катта инспектор