Зоминда қўмондонлик-штаб ўқув машқлари ўтказилди

Зомин тумани Фавқулодда вазиятлар бўлими томонидан тумандаги ҳамкор ташкилотлар билан бирга “Ҳудудий қуйи тизимларнинг фавқулодда вазиятларни бартараф этиш бўйича ҳамкорликдаги ҳаракатлари" бўйича қўмондонлик-штаб ўқув машғулотлари ўтказилди.

Ўзбекистон Республикаси Фавқулодда вазиятларда уларнинг олдини олиш ва ҳаракат қилиш Давлат тизимининг 2022 йил асосий тадбирлар режасига асосан жорий йилнинг 14-16 ноябрь кунлари Зомин туманида “Бошқарув органлари, ФВДТ ҳудудий қуйи тизимларининг аҳоли ва ҳудудларни фавқулодда вазиятлардан муҳофаза қилиш бўйича ҳаракатлари” мавзусида қўмондонлик-штаб ўқув машғулотлари ўтказилди.

Қўмондонлик-штаб ўқув машғулотларининг биринчи кунида Зомин тумани ҳокимлигида бошқарув органлари ва ФВДТ хизматлари иштирокида ишчи йиғилиши ўтказилди.

Йиғилишда машғулотлардан кўзланган асосий мақсад тизимининг тайёргарлиги ва барқарор ишлашини текшириш, ФВДТ ҳудудий қуйи тизими органларининг фавқулодда вазиятларда функционал вазифаларини бажариш йўналишларини аниқлаштириш, авария-қутқарув ва бошқа кечиктириб бўлмайдиган вазифаларни бажаришда моддий-техник таъминот масалаларини ҳал этиш, юзага келган фавқулодда вазиятлар оқибатларини бартараф этишда ФВДТ хизматларининг ҳамкорликдаги ҳаракатларини кўриб чиқиш эканлиги алоҳида қайд этиб ўтилди.

Ўқув машғулотларига ФВДТ ҳудудий қуйи тизими органлари раҳбарлар таркиби ҳамда уларнинг куч ва воситалари, ижтимоий-иқтисодиёт объектлари,оммавий ахборот воситалари жалб этилди.

Ўқув машғулотининг биринчи кунида бир қатор тактик-махсус ўқув машқлари ўтказилди.

Хусусан, тумандаги Зомин тумани йўллардан фойдаланиш унитар корхонаси йиғма командаси саф кўриги ташкил этилди.

Айни тадбирларда фавқулодда вазиятларда хабар бериш, улар содир бўлганда бирламчи вазифаларни амалга ошириш, фавқулодда вазиятлар оқибатларини бартараф этишга ихтисослашган механизациялаштирилган отрядларнинг фавқулодда вазиятларда ҳаракатланишга шайлиги синовдан ўтказилди.

Ўқув машғулотларининг сўнги кунида бошқарув органлари, куч ва воситалар билан машғулотларда фаол иштироки учун бир қатор туман ташкилот ва идора вакиллари Фавқулодда вазиятлар вазирлиги томонидан ташаккурнома ҳамда эсдалик совғалари билан тақдирланди.